ଭଦ୍ରକ (୧୬ ମାର୍ଚ୍ଚ ୨୦୨୬) - ଓଡ଼ିଆ ଭାଷା ସାହିତ୍ୟର ଇତିହାସ ଚିରକାଳ ପାଇଁ କବିଶେଖର ଚିନ୍ତାମଣି ମହାନ୍ତିଙ୍କ ପ୍ରତିଭା ଓ ସାଧନାକୁ ସମ୍ମାନ ଦେଉଥିବ । ଅଣ ଓଡ଼ିଆଙ୍କ କବଳରେ ଓଡ଼ିଆ ଭାଷା ଯେତେବେଳେ ତଳିତଳାନ୍ତ ହୋଇଯିବାକୁ ବସିଥାଏ, ସେତେବେଳେ ଓଡ଼ିଆ ଭାଷାର ମର୍ଯ୍ୟାଦା ବଜାୟ ରଖିବା ଦିଗରେ ଭାଷାପ୍ରେମୀ ସାରସ୍ୱତ ସାଧକ କବିଶେଖର ଚିନ୍ତାମଣିଙ୍କ ଭୂମିକା ଥିଲା ଅତୁଳନୀୟ । ବିଭିନ୍ନ ପତ୍ରପତ୍ରିକା ସମ୍ପାଦନା ଓ ସାମ୍ବାଦିକତା ସମୟରେ ସେ ଓଡ଼ିଆ ଭାଷାର ତ୍ରାଣକର୍ତ୍ତା ଭାବେ ଯେଭଳି ଅଣ୍ଟା ଭିଡ଼ିଥିଲେ, ତାହା ସ୍ମରଣୀୟ । ଲେଖକ ଜୀବନର ଆଦ୍ୟ କାଳରେ ଅନେକ ରସୋତ୍ତୀର୍ଣ୍ଣ କାବ୍ୟକୁ ରଚନା କଲାପରେ ଟଙ୍କାଗଛ, ଯୁଗଳମଠ, ଶନିସପ୍ତାହ, ବୁଲାଫକୀର ଓ ରୁପାଚୁଡ଼ି ଭଳି ଉପନ୍ୟାସ ଲେଖି ପ୍ରଖ୍ୟାତ ଔପନ୍ୟାସିକ ଭାବେ ଓଡ଼ିଆ ସାହିତ୍ୟରେ ପ୍ରତିଭାତ ହୋଇଥିଲେ । ତାଙ୍କ ସୃଷ୍ଟ ୫୨ଟି କାବ୍ୟରେ ଓଡ଼ିଶାର ଭୂଗୋଳ, ଇତିହାସ, ପ୍ରକୃତି ଓ ସଂସ୍କୃତିର କାବ୍ୟୋଚିତ ସ୍ଫୁରଣ ଘଟିଥିଲା ବେଳେ ମହାଭାରତୀୟ ଆଦର୍ଶର ଯେପରି ସମନ୍ୱୟ ଘଟିଛି, ଉପନ୍ୟାସ ରାଜିର ଅବକ୍ଷୟମୁଖୀ କୁସଂସ୍କାରପୂର୍ଣ୍ଣ ସମାଜବ୍ୟବସ୍ଥାକୁ ସଂସ୍କାରିତ କରିବାର ଲେଖକୀୟ ଅଭିପସା ପ୍ରତ୍ୟକ୍ଷ କରିହୁଏ ବୋଲି କବିଶେଖର ଚିନ୍ତାମଣି ମହାନ୍ତିଙ୍କ ୧୫୯ତମ ଜୟନ୍ତୀ ସମାରୋହରେ ମତ ପ୍ରକାଶ ପାଇଛି । ଓଡ଼ିଶା ସାହିତ୍ୟ ଏକାଡେମୀ ଓ ଭଦ୍ରକ ପୂଜ୍ୟପୂଜା ସଂସଦ ଆନୁକୂଲ୍ୟରେ ସଂସ୍କୃତି ଭବନଠାରେ ଅନୁଷ୍ଠିତ ଏହି ସମାରୋହକୁ ଜିଲ୍ଲାପାଳ ଦିଲ୍ଲୀପ ରାଉତରାଏ ଉଦ୍ଘାଟନ କରିଥିଲେ । ସାଧକର ଜୀବନ ଦୁଃଖମୟ ଏବଂ ସେହି ବ୍ୟଥାଦଗ୍ଧ ପ୍ରାଣରେ ବି ବିଶ୍ୱପାଇଁ କେତେ ଦରଦ ପ୍ରକାଶ ପାଇପାରେ, ତାହାହିଁ ହେଉଛି ଚିନ୍ତାମଣିଙ୍କ ସାଧନାମୟ ଜୀବନର ସାକ୍ଷ୍ୟ ବୋଲି କହିଥିଲେ ।
ମୁଖ୍ୟବକ୍ତା ଖ୍ୟାତିସମ୍ପନ୍ନ କଥାକାର ପବିତ୍ର ପାଣିଗ୍ରାହୀ କହିଲେ ଯେ କବିଶେଖର ଚିନ୍ତାମଣି ଯେଭଳି ପ୍ରତିଭାର ଅଧିକାରୀ, ତାଙ୍କୁ ସେତିକି ଉଚ୍ଚ ସମ୍ମାନରେ ବସାଇବା ଓଡ଼ିଶାବାସୀଙ୍କ କର୍ତ୍ତବ୍ୟ । ଅକଥନୀୟ ବେଦନା ଭିତରେ ବି ସାହିତ୍ୟ ସାଧନା କରି ଓଡ଼ିଆ କାବ୍ୟ ସାହିତ୍ୟକୁ ୪୮ ଖଣ୍ଡ କାବ୍ୟ, ଓଡ଼ିଆ କଥା ସାହିତ୍ୟକୁ ୫ଟି ଉପନ୍ୟାସ, ୩ଟି ଦୀର୍ଘ ଗଳ୍ପ ଓ ଜୀବନ ସାହିତ୍ୟକୁ ଅନବଦ୍ୟ ଆତ୍ମଜୀବନୀ ଗ୍ରନ୍ଥ ଦେଇଯାଇଛନ୍ତି । ସମ୍ମାନିତ ବକ୍ତା ଭାବେ ଗବେଷକ ଶିକ୍ଷାବିତ୍ କୃପାସିନ୍ଧୁ ନାୟକ କବିଶେଖର ଚିନ୍ତାମଣିଙ୍କୁ ବହୁମୁଖୀ ପ୍ରତିଭାର ଅଧିକାରୀ ଭାବେ ପ୍ରତିପାଦନ କରି ଓଡ଼ିଆ ଭାଷାର କାବ୍ୟ କବିତା, ଉପନ୍ୟାସ ଓ ପ୍ରବନ୍ଧ କ୍ଷେତ୍ରରେ ସେ ତାଙ୍କ ନିରବଚ୍ଛିନ୍ନ ସାଧନାର ପରିଚୟ ଲିପିବଦ୍ଧ କରିଯାଇଛନ୍ତି ବୋଲି ମତ ଦେଇଥିଲେ । ଅଧ୍ୟାପକ ଦତ୍ତାତ୍ରେୟ ଦାଶଙ୍କ ସଂଯୋଜନାରେ ଅନୁଷ୍ଠିତ ସମାରୋହରେ ପୂଜ୍ୟପୂଜା ସଂସଦର ସମ୍ପାଦକ ରୂପକ ବିହାରୀ ରାୟ ସ୍ୱାଗତ ଭାଷଣ ପ୍ରସଙ୍ଗରେ କବିଶେଖରଙ୍କ କାଳଜୟୀ ସୃଷ୍ଟି ଆଜିର ଯୁବପିଢ଼ି ପାଇଁ ଆଦର୍ଶ ବୋଲି କହିଥିଲେ । ସହ ସମ୍ପାଦକ ପ୍ରକୃତିବଂଧୁ ବୈକୁଣ୍ଠ ବିଶ୍ୱାଳ ମଞ୍ଚ ଆମନ୍ତ୍ରଣ ଓ ଅତିଥିମାନଙ୍କ ପରିଚୟ ପ୍ରଦାନ କରିଥିବା ବେଳେ, ଯୁବ ଲେଖକ ସଂଗ୍ରାମ ସେନାପତି ଧନ୍ୟବାଦ ଅର୍ପଣ କରିଥିଲେ । ଅଜୟ ନାୟକ, ଗୋବର୍ଦ୍ଧନ ସାମଲ, ସୁଧାକର ରାଉତ, ପୁରୁଷୋତ୍ତମ ନାଥ, ଦମୟନ୍ତୀ ନାଥ, କୈଳାସ ମହାପାତ୍ର, ପଦ୍ମନ ରାୟ, ମନୋଜ ସ୍ୱାଇଁ, ମନୋରମା ରାୟ, ବାବୁଲାଲ ଦାସ, ରମେଶ ଦାସ, ବିପ୍ଳବ ହୋତା, ଅରୂପାନନ୍ଦ ନାୟକ, ପ୍ରୀତିଲତା ପଣ୍ଡା, ଅଂଶୁମାନ ସ୍ୱାଇଁ, ଶରତ ଜେନା, ଶାନ୍ତନୁ ରାଉତ, ଦୀପ୍ତିମୟୀ ସାହୁ ଓ ଛାତ୍ରଛାତ୍ରୀମାନେ ଯୋଗ ଦେଇଥିଲେ ।
ସମ୍ପୂର୍ଣ୍ଣ ଓଡ଼ିଆରେ ଓଡ଼ିଆ ଲୋକମାନଙ୍କ ପାଖରେ ମାଗଣାରେ ଖବର ପହଞ୍ଚାଇବା ପାଇଁ ଆମର ଏହି ସ୍ୱତନ୍ତ୍ର ପ୍ରଚେଷ୍ଟା । ନୂଆ ଖବର ଯେ କେବଳ ନୂଆ ନୂଆ ଖବର ସବୁବେଳେ ନେଇକି ଆସିବ ତାହା ନୁହେଁ, ଆମେ ନୂଆ ରୂପରେ, ନିଆରା ଢଙ୍ଗରେ ଖବର ପହଞ୍ଚାଇବୁ ଆମର ପାଠକମାନଙ୍କ ପାଖରେ । ସଭିଙ୍କ ଖବର ସର୍ବଲୋଚନ କରିବାପାଇଁ ଆରମ୍ଭ ହୋଇଥିବା ଏହି ପ୍ରଚେଷ୍ଟାରେ ଆପଣମାନଙ୍କର ସହଯୋଗ କାମ୍ୟ ।