ଭଦ୍ରକ (୧୮ ଜୁନ ୨୦୨୫) : ଭଦ୍ରକ ଜିଲା ମହତାବଙ୍କ ଜନ୍ମ ମାଟି ଐତିହାସିକ ଆଗରପଡ଼ାଠାରେ ମହତାବ ସ୍ମୃତି ସଂଗ୍ରାହଳୟ ପ୍ରତିଷ୍ଠା ନେଇ ଅଞ୍ଚଳବାସୀଙ୍କ ମଧ୍ୟରେ ଉତ୍କଣ୍ଠା ପ୍ରକାଶ ପାଇଥିବା ବେଳେ ଆସନ୍ତା ୨୦ ତାରିଖ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭୁବନେଶ୍ୱର ଆସୁଥିବା ବେଳେ ମହାପୁରୁଷଙ୍କ ଜନ୍ମ ସ୍ଥାନକୁ ଏ୍ୟୗତିହ୍ୟ ଗ୍ରାମ୍ୟ ଘୋଷଣା କରିବେ ।
ଏହି ପରିପ୍ରେକ୍ଷୀରେ ନବ ଉତ୍କଳର ନିର୍ମାତା ଉତ୍କଳ କେଶରୀ ଡ. ହରେକୃଷ୍ଣ ମହତାବଙ୍କ ଜନ୍ମସ୍ଥାନ ଆଗରପଡ଼ାସ୍ଥିତ ଜିଲା ପ୍ରଶିକ୍ଷଣ ପ୍ରତିଷ୍ଠାନ ପାର୍ଶ୍ୱରେ ମହତାବ ସ୍ମୃତି ସଂଗ୍ରାହାଳୟ ପ୍ରତିଷ୍ଠା ପାଇଁ ପ୍ରଶାସନ ପକ୍ଷରୁ ସ୍ଥାନ ଚିହ୍ନଟ ହୋଇସାରିଛି । ଆଜି ବିଡିଓ ସୀତାକାନ୍ତ ରାଉତ୍, ସହକାରୀ ନିର୍ବାହୀ ଯନ୍ତ୍ରୀ ଶ୍ରଦ୍ଧାସୁମନ ନାଥ, ବ୍ଲକ ଅଧ୍ୟକ୍ଷ ମନୋରଞ୍ଜନ ଘଡ଼େଇ, ସାମ୍ବାଦିକ ହେମନ୍ତ ସିଂହ ପ୍ରସ୍ତାବିତ ସ୍ଥାନ ପରିଦର୍ଶନ କରିଛନ୍ତି । ଅନ୍ୟମାନଙ୍କ ମଧ୍ୟରେ ମହତାବ ମଣ୍ଡଳ ସଭାପତି ଅମୂଲ୍ୟରତ୍ନ ନନ୍ଦ, ଗୋପାଳକୃଷ୍ଣ ଦାଶ, ଚିନ୍ମୟ ମହାପାତ୍ର, ଅଶୋକ ପରିଡ଼ାଙ୍କ ସମେତ ସ୍ଥାନୀୟ ବିଜେପି କାର୍ଯ୍ୟକର୍ତ୍ତା ଉପସ୍ଥିତ ଥିଲେ ।
ପ୍ରଧାନମନ୍ତ୍ରୀ ଭିଡିଓ କନ୍ଫରେନ୍ସିଂ ମାଧ୍ୟମରେ ଐତିହ୍ୟ ଗ୍ରାମ୍ୟ ଘୋଷଣା କରିବାକୁ ଥିବାବେଳେ ଉକ୍ତ ଦିନ ଭଦ୍ରକ ସାଂସଦ, ବିଧାୟକ, ଜନପ୍ରତିନିଧି ,ଜିଲ୍ଲାପାଳ ଓ ସରକାରୀ ଅଧିକାରୀମାନେ କାର୍ଯ୍ୟକ୍ରମ ସ୍ଥଳୀରେ ଉପସ୍ଥିତ ରହି ଶିଳାନ୍ୟାସ କରିବେ । ଏହାକୁ ବ୍ୟାପକ କରାଯିବା ନେଇ ଯୋଜନା ଥିବାବେଳେ କାର୍ଯ୍ୟକ୍ରମକୁ ଏଲ୍ଇଡି ମାଧ୍ୟମରେ ଲୋକେ ଦେଖିବେ । ସ୍ୱତନ୍ତ୍ର ଭାବେ ଭାରତ ସଞ୍ଚାର ନିଗମ ପକ୍ଷରୁ କେବୁଲ୍ ବିଛାଯିବ ବୋଲି ବିଭାଗୀୟ ସୁତ୍ରରୁ ଜଣା ପଡ଼ିଛି । ଅନ୍ୟପକ୍ଷରେ ବିଜେପି ପକ୍ଷରୁ ଅଧିକରୁ ଅଧିକ ଲୋକଙ୍କୁ ଆଣିବା ନେଇ ଯୋଜନା ଚାଲିଛି । ପ୍ରକାଶ ଯେ ଅଞ୍ଚଳବାସୀଙ୍କ ଦୀର୍ଘ ଦାବି ପରେ ରାଜ୍ୟ ସରକାରଙ୍କ ପକ୍ଷରୁ ଏଠାରେ ଆନୁମାନିକ ୪୦ କୋଟି ଟଙ୍କା ବ୍ୟୟରେ ମହତାବଙ୍କ ପ୍ରତିମୂର୍ତ୍ତି, ସ୍ମୃତି ସଂଗ୍ରାହାଳୟ, ପାଠାଗାର ଓ ପାର୍କ ଆଦି ନିର୍ମାଣ ହେବ ବୋଲି ଜଣାଯାଇଛି ।
(ସମ୍ବାଦଦାତା: ଚାନ୍ଦିନୀ ମହାନ୍ତି)
ସମ୍ପୂର୍ଣ୍ଣ ଓଡ଼ିଆରେ ଓଡ଼ିଆ ଲୋକମାନଙ୍କ ପାଖରେ ମାଗଣାରେ ଖବର ପହଞ୍ଚାଇବା ପାଇଁ ଆମର ଏହି ସ୍ୱତନ୍ତ୍ର ପ୍ରଚେଷ୍ଟା । ନୂଆ ଖବର ଯେ କେବଳ ନୂଆ ନୂଆ ଖବର ସବୁବେଳେ ନେଇକି ଆସିବ ତାହା ନୁହେଁ, ଆମେ ନୂଆ ରୂପରେ, ନିଆରା ଢଙ୍ଗରେ ଖବର ପହଞ୍ଚାଇବୁ ଆମର ପାଠକମାନଙ୍କ ପାଖରେ । ସଭିଙ୍କ ଖବର ସର୍ବଲୋଚନ କରିବାପାଇଁ ଆରମ୍ଭ ହୋଇଥିବା ଏହି ପ୍ରଚେଷ୍ଟାରେ ଆପଣମାନଙ୍କର ସହଯୋଗ କାମ୍ୟ ।