ରାଉରକେଲା (୧୮ ଅକ୍ଟୋବର ୨୦୨୪): ରାଉରକେଲାସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ପକ୍ଷରୁ ଆଜି ଦିଲ୍ଲୀପ ତିର୍କୀ ଷ୍ଟାଡିୟମରେ ସର୍ବଭାରତୀୟ ଆନ୍ତଃ ଏନ୍ଆଇଟି କ୍ରୀଡ଼ା ପ୍ରତିଯୋଗିତା ୨୦୨୪-୨୫ ଉଦ୍ଘାଟିତ ହୋଇଯାଇଛି । ଏହି ସମ୍ମାନଜନକ ସମାରୋହରେ ତିନି ଦିନିଆ କ୍ରୀଡ଼ା ପ୍ରତିଯୋଗିତା (ଅକ୍ଟୋବର ୧୮-୨୦, ୨୦୨୪) ଆରମ୍ଭ ହେବ, ଯେଉଁଥିରେ ସମଗ୍ର ଭାରତର ୨୬ଟି ଏନ୍ଆଇଟି ଏକାଠି ହେବ । ଫୁଟବଲ (ପୁରୁଷ ବର୍ଗ) ଏବଂ ଲନ୍ ଟେନିସ୍ (ପୁରୁଷ ଓ ମହିଳା ବର୍ଗ) ଭଳି ଦୁଇଟି ପ୍ରମୁଖ କ୍ରୀଡ଼ା ବିଭାଗରେ ୬୦୦ରୁ ଅଧିକ ଖେଳାଳୀ ଭାଗ ନେଇଛନ୍ତି ।
ରାଉରକେଲାର ତିନୋଟି ପ୍ରମୁଖ ଷ୍ଟାଡିୟମରେ ଫୁଟବଲ ମ୍ୟାଚ୍ ଆୟୋଜନ କରାଯାଇ ଏକ ସୁସଂଗଠିତ କାର୍ଯ୍ୟକ୍ରମ ସୁନିଶ୍ଚିତ କରାଯାଉଛି । ଏଥିରେ ବିର୍ସା ମୁଣ୍ଡା ଆଥଲେଟିକ୍ ଷ୍ଟାଡିୟମ, ଇସ୍ପାତ ଷ୍ଟାଡିୟମ ଓ ଦିଲ୍ଲୀପ ତିର୍କୀ ଷ୍ଟାଡିୟମ-ଏନ୍ଆଇଟି ରାଉରକେଲା ରହିଛି । ଅନ୍ୟପକ୍ଷରେ ଉଭୟ ପୁରୁଷ ଓ ମହିଳା ବର୍ଗପାଇଁ ସମସ୍ତ ଲନ୍ ଟେନିସ୍ ମ୍ୟାଚ୍ ଏନ୍ଆଇଟି ରାଉରକେଲା କ୍ୟାମ୍ପସ ସ୍ଥିତ ପିଟି ଉଷା ସ୍ପୋର୍ଟସ କମ୍ପ୍ଲେକ୍ସରେ ଅନୁଷ୍ଠିତ ହେଉଛି । ଅନ୍ତିମ ଫୁଟ୍ବଲ୍ ମ୍ୟାଚ୍ ସହ ଏହି କ୍ରୀଡ଼ା ପ୍ରତିଯୋଗିତା ଶେଷ ହେବ ଏବଂ ଏହା ପରେ ୨୦ ଅକ୍ଟୋବର (ରବିବାର) ସନ୍ଧ୍ୟା ୭ଟାରେ ବିର୍ସା ଛକ ସ୍ଥିତ ବିର୍ସା ମୁଣ୍ଡା ଆଥଲେଟିକ୍ ଷ୍ଟାଡିୟମରେ ସମାପନ ହେବ ।
ଆଜି ଉଦ୍ଘାଟନୀ ଉତ୍ସବରେ ଏନ୍ଆଇଟି ରାଉରକେଲାସ୍ଥିତ ଛାତ୍ର କାର୍ଯ୍ୟକଳାପ କେନ୍ଦ୍ରର ସଭାପତି ପ୍ରଫେସର ରାଜୀବ କୁମାର ପଣ୍ଡା ଯୋଗ ଦେଇ ସମସ୍ତଙ୍କୁ ସ୍ୱାଗତ କରିଥିଲେ । ଏହି ଆନ୍ତଃ-ଏନ୍ଆଇଟି କ୍ରୀଡ଼ା ପ୍ରତିଯୋଗିତା ପାଇଁ ଏନ୍ଆଇଟି ରାଉରକେଲାକୁ ଫୁଟ୍ବଲ୍ ଓ ଲନ୍ ଟେନିସ୍ ପ୍ରତିଯୋଗିତା ଆୟୋଜନ ଦାୟିତ୍ୱ ଦିଆଯାଇଛି, ଯେଉଁଥିରେ ୩୧ଟି ଏନ୍ଆଇଟି ମଧ୍ୟରୁ ୨୬ଟି ଅଂଶଗ୍ରହଣ କରିଛନ୍ତି । ଦେଶର ବିଭିନ୍ନ ସ୍ଥାନର ଦଳ ସହ ଅଂଶଗ୍ରହଣକାରୀଙ୍କ ବିବିଧତା ଉପରେ ସେ ଗୁରୁତ୍ୱାରୋପ କରିବା ସହ ପ୍ରତ୍ୟେକ ଅଂଶଗ୍ରହଣକାରୀ ଏନ୍ଆଇଟି ରାଉରକେଲାର ସ୍ମରଣୀୟ ସ୍ମୃତି ନେଇ ଫେରିବେ ବୋଲି ଆଶା ବ୍ୟକ୍ତ କରିଥିଲେ ।
କାର୍ଯ୍ୟକ୍ରମକୁ ଉଦ୍ଘାଟନ କରି ପ୍ରଫେସର କେ ଉମାମହେଶ୍ୱର ରାଓ (ଏନ୍ଆଇଟି ରାଉରକେଲାର ନିର୍ଦ୍ଦେଶକ) କହିଥିଲେ, "ପରସ୍ପରକୁ ଜାଣିବା, ନୂତନ ବନ୍ଧୁତା ସ୍ଥାପନ କରି ଏବଂ ଅବଶ୍ୟ ପ୍ରତ୍ୟେକ ମ୍ୟାଚ୍ରେ ନିଜର ଶ୍ରେଷ୍ଠ ପ୍ରଦର୍ଶନ କରି ନିଜ ଦୁନିଆକୁ ବିସ୍ତାର କରିବାର ଏହା ଆପଣଙ୍କର ସୁଯୋଗ । ଆପଣ ଜିତିବା କିମ୍ବା ହାରିବା, ଚିନ୍ତା କରିବା, ଉନ୍ନତି ଆଣିବା ଏବଂ ଶକ୍ତିଶାଳୀ ହୋଇ ଫେରିବା ଗୁରୁତ୍ୱପୂର୍ଣ୍ଣ । ମୁଁ ଆପଣ ସମସ୍ତଙ୍କୁ ପୂରା ଟୁର୍ଣ୍ଣାମେଣ୍ଟରେ ସଫଳତା ତଥା ଉତ୍ତମ ସ୍ୱାସ୍ଥ୍ୟର କାମନା କରୁଛି ।"
ସମ୍ମାନିତ ଅତିଥି ଭାବେ ଓଡ଼ିଶା ପ୍ରଶାସନିକ ସେବା ଅଧିକାରୀ (ଓଏଏସ୍) ତଥା ରାଉରକେଲା କ୍ରୀଡ଼ା ଉପନିର୍ଦେଶକ ସୁଦୀପ୍ତ କୁମାର ନାୟକ ଯୋଗଦେଇ କହିଥିଲେ, "ରାଉରକେଲା ସହରକୁ ଏନ୍ଆଇଟିର ସମସ୍ତ ଛାତ୍ରଛାତ୍ରୀ, ଅଧ୍ୟାପକ ଓ କର୍ମଚାରୀଙ୍କୁ ମୁଁ ସ୍ୱାଗତ କରୁଛି । କ୍ରୀଡ଼ା ପ୍ରଶାସନ ଓ ଏହି ଅଞ୍ଚଳର କ୍ରୀଡ଼ା ସୁବିଧାର ରକ୍ଷକ ଭାବରେ, ମୁଁ ଆପଣମାନଙ୍କୁ ଏଠାରେ ଥିବା ପ୍ରଭାବଶାଳୀ କ୍ରୀଡ଼ା ଭିତ୍ତିଭୂମି ଅନୁସନ୍ଧାନ କରିବାକୁ ଉତ୍ସାହିତ କରୁଛି । ମୁଁ ନିଶ୍ଚିତ ଯେ ଆପଣ ଉଭୟ ଟୁର୍ଣ୍ଣାମେଣ୍ଟ ଏବଂ ସହରର ସ୍ମୃତିକୁ ନେଇ ଯିବେ । ମୁଁ ଆପଣ ସମସ୍ତଙ୍କୁ ଆନନ୍ଦଦାୟକ ରହିବା ଏବଂ ପ୍ରତିଯୋଗିତାରେ ଶୁଭେଚ୍ଛା ଜଣାଉଛି ।"
ଏନ୍ଆଇଟି ରାଉରକେଲାର ଛାତ୍ର ବ୍ୟାପାର ଡିନ୍ ପ୍ରଫେସର ନିରଞ୍ଜନ ପଣ୍ଡା ପ୍ରତିଯୋଗୀମାନଙ୍କୁ ପ୍ରେରଣା ଦେଇ କହିଥିଲେ ଯେ ଏଭଳି ଟୁର୍ଣ୍ଣାମେଣ୍ଟରେ ପ୍ରକୃତ ବିଜୟ ଦଳଗୁଡ଼ିକର ସାମୂହିକ ପ୍ରୟାସ ଓ ଆତ୍ମଆବିଷ୍କାରରେ ରହିଛି । ଫିଟ୍ ରହିବା ଏବଂ କ୍ରୀଡ଼ାରେ ନିୟୋଜିତ ହେବାକୁ ଆଗ୍ରହୀ ସମସ୍ତ ଛାତ୍ରଛାତ୍ରୀଙ୍କ ପାଇଁ ପ୍ରତିଯୋଗୀମାନେ ରାଷ୍ଟ୍ରଦୂତ ଭାବେ କାର୍ଯ୍ୟ କରିବେ ବୋଲି ସେ ଗୁରୁତ୍ୱାରୋପ କରିଥିଲେ ।
ବିର୍ସା ମୁଣ୍ଡା ଆଥଲେଟିକ୍ ଷ୍ଟାଡିୟମ ଓ ଇସ୍ପାତ ଷ୍ଟାଡିୟମରେ ସୁବିଧା ଯୋଗାଇ ଦେଇଥିବାରୁ ଏନ୍ଆଇଟି ରାଉରକେଲାର ରେଜିଷ୍ଟ୍ରାର୍ ପ୍ରଫେସର ରୋହନ ଧୀମାନ ରାଉରକେଲା ମହାନଗର ନିଗମର କମିଶନର ଆଶୁତୋଷ କୁଲକର୍ଣ୍ଣି, ସମ୍ମାନିତ ଅତିଥି ସୁଦୀପ୍ତ କୁମାର ନାୟକ ଓ ରାଉରକେଲା ଇସ୍ପାତ କାରଖାନା (ଆର୍ଏସ୍ପି) ପ୍ରଶାସନକୁ କୃତଜ୍ଞତା ଜ୍ଞାପନ କରିଥିଲେ । ରାଉରକେଲାର ବିଶ୍ୱସ୍ତରୀୟ କ୍ରୀଡ଼ା ଭିତ୍ତିଭୂମିକୁ ପ୍ରୋତ୍ସାହିତ ଓ ପ୍ରଦର୍ଶିତ କରିବା ଉଦ୍ଦେଶ୍ୟରେ ଏହି ଜାତୀୟ ଓ ଅନ୍ତର୍ଜାତୀୟ ସ୍ତରର ଷ୍ଟାଡିୟମରେ ଅନେକ ମ୍ୟାଚ୍ ଆୟୋଜନ କରାଯାଉଛି ।
ଏହି ଟୁର୍ଣ୍ଣାମେଣ୍ଟର ପର୍ଯ୍ୟବେକ୍ଷକ ବିଜୟ କେ. ମିଶ୍ର (ଏନ୍ଆଇଟି ଜଳନ୍ଧରର ଛାତ୍ର କାର୍ଯ୍ୟକଳାପ ଓ କ୍ରୀଡ଼ା ଅଧିକାରୀ) ଏନ୍ଆଇଟି ରାଉରକେଲାର ଆୟୋଜକ ଦଳ ଓ ପ୍ରଶାସନକୁ ସମସ୍ତ ଖେଳାଳିଙ୍କ ଆରାମଦାୟକ ରହିବା ଓ ସହାୟକ ବାତାବରଣ ଯୋଗାଇ ଦେଇଥିବାରୁ ପ୍ରଶଂସା କରିଥିଲେ । ଏନ୍ଆଇଟି ରାଉରକେଲାସ୍ଥିତ ଖେଳ ଓ କ୍ରୀଡ଼ା ସମିତିର ଉପସଭାପତି ପ୍ରଫେସର ମହମ୍ମଦ ଖାଲିଦ ଗୁଲ୍ ଓ ପ୍ରଫେସର ଭେଙ୍କଟ ଆର୍ ନାଏକଙ୍କ ସହ ଛାତ୍ର କାର୍ଯ୍ୟକଳାପ ଓ କ୍ରୀଡ଼ା ଅଧିକାରୀ ସି.ଅଲାଗେସନ କାର୍ଯ୍ୟକ୍ରମ ପରିଚାଳନାରେ ପ୍ରମୁଖ ଭୂମିକା ଗ୍ରହଣ କରିଥିଲେ ।
ସର୍ବଭାରତୀୟ ଆନ୍ତଃ ଏନ୍ଆଇଟି କ୍ରୀଡ଼ା ପ୍ରତିଯୋଗିତା ୨୦୨୪-୨୫ରେ ଦେଶର ୨୬ଟି ଏନ୍ଆଇଟି ଅଂଶଗ୍ରହଣ କରୁଛନ୍ତି । ଏଥିରେ ଏମ୍ଏଏନ୍ଆଇଟି ଭୋପାଳ, ଏନ୍ଆଇଟି ଅଗରତାଲା, ଏନ୍ଆଇଟି ଆନ୍ଧ୍ରପ୍ରଦେଶ, ଏନ୍ଆଇଟି ଅରୁଣାଚଳ ପ୍ରଦେଶ, ଏନ୍ଆଇଟି କାଲିକଟ, ଏନ୍ଆଇଟି ଦିଲ୍ଲୀ, ଏନ୍ଆଇଟି ଦୁର୍ଗାପୁର, ଏନ୍ଆଇଟି ହମିରପୁର, ଏନ୍ଆଇଟି ଜୟପୁର, ଏନ୍ଆଇଟି ଜଳନ୍ଧର, ଏନ୍ଆଇଟି ଜାମସେଦପୁର, ଏନ୍ଆଇଟି କୁରୁକ୍ଷେତ୍ର, ଏନ୍ଆଇଟି ମଣିପୁର, ଏନ୍ଆଇଟି ମେଘାଳୟ, ଏନ୍ଆଇଟି ମିଜୋରାମ, ଏନ୍ଆଇଟି ନାଗାଲାଣ୍ଡ, ଏନ୍ଆଇଟି ନାଗପୁର, ଏନ୍ଆଇଟି ପାଟନା, ଏନ୍ଆଇଟି ପୁଡୁଚେରୀ, ଏନ୍ଆଇଟି ରାୟପୁର, ଏନ୍ଆଇଟି ରାଉରକେଲା, ଏନ୍ଆଇଟି ସିଲଚର, ଏନ୍ଆଇଟି ସୁରତକଲ, ଏନ୍ଆଇଟି ତ୍ରିଚି, ଏନ୍ଆଇଟି ୱାରାଙ୍ଗଲ ଏବଂ ଏସ୍ଭିଏନ୍ଆଇଟି ସୁରତ ଅନ୍ତର୍ଭୁକ୍ତ ।
ଟୁର୍ଣ୍ଣାମେଣ୍ଟର ଆବାହକ ପ୍ରଫେସର ମହମ୍ମଦ ଖାଲିଦ ଗୁଲ ଧନ୍ୟବାଦ ଅର୍ପଣ କରି କାର୍ଯ୍ୟକ୍ରମ ଶେଷ କରିଥିଲେ ।
ସମ୍ପୂର୍ଣ୍ଣ ଓଡ଼ିଆରେ ଓଡ଼ିଆ ଲୋକମାନଙ୍କ ପାଖରେ ମାଗଣାରେ ଖବର ପହଞ୍ଚାଇବା ପାଇଁ ଆମର ଏହି ସ୍ୱତନ୍ତ୍ର ପ୍ରଚେଷ୍ଟା । ନୂଆ ଖବର ଯେ କେବଳ ନୂଆ ନୂଆ ଖବର ସବୁବେଳେ ନେଇକି ଆସିବ ତାହା ନୁହେଁ, ଆମେ ନୂଆ ରୂପରେ, ନିଆରା ଢଙ୍ଗରେ ଖବର ପହଞ୍ଚାଇବୁ ଆମର ପାଠକମାନଙ୍କ ପାଖରେ । ସଭିଙ୍କ ଖବର ସର୍ବଲୋଚନ କରିବାପାଇଁ ଆରମ୍ଭ ହୋଇଥିବା ଏହି ପ୍ରଚେଷ୍ଟାରେ ଆପଣମାନଙ୍କର ସହଯୋଗ କାମ୍ୟ ।