ପ୍ରଶ୍ନକାଳ ଆରମ୍ଭ ହେବା ମାତ୍ରେ ବିଜେପି ଓ କଂଗ୍ରେସ ସଭ୍ୟମାନେ ନିଜ ନିଜ ଆସନରେ ଠିଆ ହୋଇ ପଡ଼ିଥିଲେ । ବିଜେପି ସଭ୍ୟମାନେ ଗୃହର ମଧ୍ୟ ଭାଗକୁ ମାଡ଼ି ଆସିଥିଲା ବେଳେ କଂଗ୍ରେସ ସଭ୍ୟମାନେ ନିଜ ନିଜ ଆସନରେ ଠିଆ ହୋଇ ସରକାରଙ୍କ ବିରୋଧରେ ନାରା ଲଗାଇଥିଲେ । ନାବାଳିକା ଦୁଷ୍କର୍ମ ବଢ଼ିଚାଲିଥିଲା ବେଳେ ତା' ଉପରେ ଉଚିତ ଆଲୋଚନା ନ କରିବା ଯାଏଁ ଅନ୍ୟ କୌଣସି କାର୍ଯ୍ୟକୁ ନ ଯିବା ପାଇଁ ଉଭୟ ଦଳ ଦାବି କରିଥିଲେ । ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବିରେ ବିଜେପି ସଭ୍ୟମାନେ ନାରାବାଜି କରିଥିଲେ । ଗୃହରେ ଅସ୍ବାଭାବିକ ସ୍ଥିତି ସୃଷ୍ଟି ହୋଇଥିଲା । ତା'ରି ଭିତରେ ବାଚସ୍ପତି ପ୍ରଶ୍ନକାଳ ଆରମ୍ଭ କରି ଏକ ପ୍ରଶ୍ନର ଉତ୍ତର ଦେବାକୁ ପଞ୍ଚାୟତିରାଜ ମନ୍ତ୍ରୀଙ୍କୁ ଡାକିଥିଲେ ଓ ଏଥିରେ ବିରୋଧୀ ଅଧିକ ଉତ୍କ୍ଷିପ୍ତ ହୋଇପଡ଼ିଥିଲେ । ବିରୋଧୀ ଦଳ ମୁଖ୍ୟ ସେଚତକ ମୋହନ ମାଝୀ ଚେୟାର ଉପରେ ଠିଆ ହୋଇ ବାଚସ୍ପତିଙ୍କ ପୋଡ଼ିୟମ୍ ବାଡ଼େଇଥିଲେ । ଏମିତି ଘୋ ଘା ଭିତରେ ମନ୍ତ୍ରୀଙ୍କ ଉତ୍ତର ଶୁଣାଯାଇ ନ ଥିଲା । ବାଧ୍ୟ ହୋଇ ବାଚସ୍ପତି ୧୦ଟା ୩୨ରେ ଗୃହକୁ ସିଧା ଅପରାହ୍ନ ୩ଟା ପର୍ଯ୍ୟନ୍ତ ମୁଲତବୀ ରଖିଥିଲେ । ୩ଟା ବେଳେ ଗୃହ କାର୍ଯ୍ୟ ଆରମ୍ଭ ହେଲା ମାତ୍ରେ ସମାନ ଦୃଶ୍ୟ ଦେଖିବାକୁ ମିଳିଲା । ଉଭୟ ବିଜେପି ଓ କଂଗ୍ରେସ ସଭ୍ୟମାନେ ଗୃହ ମଧ୍ୟ ଭାଗକୁ ମାଡ଼ି ଆସିଥିଲେ । ୩ ମିନିଟ୍ ପରେ ଅର୍ଥାତ ୩ଟା ୩ରେ ବାଚସ୍ପତି ଗୃହକୁ ଅଧ ଘଣ୍ଟା ମୁଲତବୀ ରଖିଥିଲେ । ୩ଟା ୩୩ରେ ଗୃହ କାର୍ଯ୍ୟ ଆରମ୍ଭ ହେଲା ପରେ ବାଚସ୍ପତି ଗୃହକୁ ଚଳାଇ ରଖିବାକୁ ଉଦ୍ୟମ କଲେ, କିନ୍ତୁ ବିରୋଧୀଙ୍କ ପ୍ରତିବାଦର ସ୍ବର ଏତେ ତୀବ୍ର ଥିଲା ଯେ ଗୃହ ଚଳାଇବା ସମ୍ଭବପର ହୋଇପାରିନଥିଲା । ୩ଟା ୩୭ରେ ପୁଣି ଅଧ ଘଣ୍ଟା ମୁଲତବୀ ରଖାଗଲା । ୪ଟା ୭ରେ ବାଚସ୍ପତି ଗୃହକୁ ଆସି ସର୍ବଦଳୀୟ ବୈଠକ ଡକାଯିବା ନେଇ ଘୋଷଣା କରି ୪ଟା ୮ରେ ଗୃହକୁ ଏକ ଘଣ୍ଟା ମୁଲତବୀ ରଖିଥିଲେ । ବୈଠକ ଚାଲିଥିବାରୁ ୫ଟା ୮ରୁ ୫ଟା ୩୮, ୫ଟା ୩୮ରୁ ୬ଟା ୮, ୬ଟା ୮ରୁ ୬ଟା ୩୮ ଯାଏ ଗୃହ ମୁଲତବୀ ରହିଥିଲା । ୬ଟା ୩୮ରେ ଗୃହ କାର୍ଯ୍ୟ ଆରମ୍ଭ ହେଲା। ସର୍ବଦଳୀୟ ବୈଠକର ନିଷ୍ପତ୍ତି ଅନୁଯାୟୀ ଆସନ୍ତାକାଲି ନାବାଳିକା ଦୁଷ୍କର୍ମ ଓ ନିଖୋଜ ପ୍ରସଙ୍ଗରେ ମୁଲତବୀ ଆଲୋଚନା ହେବ ବୋଲି ବାଚସ୍ପତି ସୂଚନା ଦେଇଥିଲେ ।
ସମ୍ପୂର୍ଣ୍ଣ ଓଡ଼ିଆରେ ଓଡ଼ିଆ ଲୋକମାନଙ୍କ ପାଖରେ ମାଗଣାରେ ଖବର ପହଞ୍ଚାଇବା ପାଇଁ ଆମର ଏହି ସ୍ୱତନ୍ତ୍ର ପ୍ରଚେଷ୍ଟା । ନୂଆ ଖବର ଯେ କେବଳ ନୂଆ ନୂଆ ଖବର ସବୁବେଳେ ନେଇକି ଆସିବ ତାହା ନୁହେଁ, ଆମେ ନୂଆ ରୂପରେ, ନିଆରା ଢଙ୍ଗରେ ଖବର ପହଞ୍ଚାଇବୁ ଆମର ପାଠକମାନଙ୍କ ପାଖରେ । ସଭିଙ୍କ ଖବର ସର୍ବଲୋଚନ କରିବାପାଇଁ ଆରମ୍ଭ ହୋଇଥିବା ଏହି ପ୍ରଚେଷ୍ଟାରେ ଆପଣମାନଙ୍କର ସହଯୋଗ କାମ୍ୟ ।