ଭଦ୍ରକ (୨୬ ଫେବୃଆରୀ ୨୦୨୬): ଭଦ୍ରକ ଜିଲ୍ଲାର ଲୁଣାଞ୍ଚଳବାସୀଙ୍କୁ ପାନୀୟ ଜଳଯୋଗାଣ ଲାଗି ୭୫୪ କୋଟି ଟଙ୍କା ବୃହତ୍ତ ପାନୀୟ ଜଳ ପ୍ରକଳ୍ପ ପରିକଳ୍ପନା ଗତ ସରକାର ଅମଳରେ କରାଯାଇଥିଲା । ୨୦୧୯ ଫେବୃଆରୀ ୧୫ ତାରିଖରେ ମେଘା ଇଞ୍ଜିନିରିଙ୍ଗ୍ ପ୍ରାଇଭଟେ୍ ଲିମିଟେଡ୍ ସହିତ ପ୍ରକଳ୍ପ କାର୍ଯ୍ୟକାରିତା ଲାଗି ଚୁକ୍ତିନାମା କରିଥିଲା ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ । ୨୦୨୧ ଫେବୃଆରୀ ୧୪ ତାରିଖ ସୁଦ୍ଧା ପ୍ରକଳ୍ପ କାର୍ଯ୍ୟ ଶେଷ ହେବାର କଥା । ହେଲେ ୨୦୨୬ ଫେବୃଆରୀ ୧୪ ସୁଦ୍ଧା ସରିନି ପ୍ରକଳ୍ପ କାର୍ଯ୍ୟ । ଅର୍ଥାତ ୨ ବର୍ଷ ମଧ୍ୟରେ ସରିବାକୁ ଥିବା ପ୍ରକଳ୍ପ କାର୍ଯ୍ୟ ୭ ବର୍ଷ ପରେ ବି ସରୁନି ।
ଜିଲ୍ଲାର ଚାନ୍ଦବାଲି, ତିହିଡ଼ି, ବାସୁଦେବପୁର ଓ ଧାମନଗର ବ୍ଲକର ଚିହ୍ନଟ ଲୁଣାଞ୍ଚଳର ୫୨୬ଟି ଗାଁର ଅଧିବାସୀଙ୍କ ତୃଷ୍ଣା ମେଣ୍ଟାଇବା ଲାଗି ଉଦ୍ଦିଷ୍ଟ ଥିଲା ଏହି ବୃହତ୍ତ ପାନୀୟ ଜଳ ପ୍ରକଳ୍ପ । କେନ୍ଦ୍ରାପଡ଼ା ଜିଲାର ଖରସ୍ରୋତା ନଦୀରୁ ପାଣି ଉଠାଇ ତାହାକୁ ବିଶୋଧନ କରି ଓଭରହେଡ୍ ଟାଙ୍କି ଜରିଆରେ ଲୁଣାଞ୍ଚଳରେ ଯୋଗାଣ କରିବା ରହିଛି ପ୍ରକଳ୍ପର ଉଦ୍ଦେଶ୍ୟ । ଚାନ୍ଦବାଲି ବ୍ଲକର ୨୬୬ଟି ଗାଁ, ବାସୁଦେବପୁରର ୧୧୮ଟି, ତିହିଡ଼ିର ୧୦୯ଟି ଓ ଧାମନଗରର ୩୩ଟି ଏମିତି ମୋଟ ୫୨୬ଟି ଗାଁର ୬.୨୫ ଲକ୍ଷ ଲୋକ ଉପକୃତ ହେବେ ଏହି ପ୍ରକଳ୍ପ ମାଧ୍ୟମରେ ।
୫ ବର୍ଷ ବିଳମ୍ବରେ ପ୍ରକଳ୍ପ କାର୍ଯ୍ୟ କରୁଥିବା ଠିକାସଂସ୍ଥା କିନ୍ତୁ ପୂର୍ବ ସରକାର ଅମଳରେ ପ୍ରକଳ୍ପ ପାଇଁ ଉଦ୍ଦିଷ୍ଟ ଅନୁଦାନର ୯୦ ପ୍ରତିଶତ ବିଲ୍ କୌଣସି ଉପାୟରେ ନେଇନେବାକୁ ସକ୍ଷମ ହୋଇଥିଲା । ଏଭଳି ଅନିୟମିତା ନେଇ କେତେକ ବିଭାଗୀୟ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ବି ହୋଇଥିଲା । ତେବେ କୌଣସି ମତେ ପ୍ରକଳ୍ପ କାର୍ଯ୍ୟ ସାରିବ ବୋଲି ଉକ୍ତ ଠିକାସଂସ୍ଥା ବିଭାଗକୁ ଲିଖିତ ଭାବେ ଅବଗତ କରାଇ ଏବେ ବି ନିର୍ମାଣ କାର୍ଯ୍ୟ ଜାରି ରଖିଛି । ହେଲେ ପ୍ରତିଥର ଉକ୍ତ ସଂସ୍ଥା ନିଜଆଡ଼ୁ ଅତିରିକ୍ତ ସମୟ ନେଉଥିଲେ ବି ପ୍ରକଳ୍ପ କାର୍ଯ୍ୟ ସରୁନାହିଁ । ଏପଟେ ଅଡ଼ୁଆରେ ପଡ଼ି ଠିକାସଂସ୍ଥାକୁ ବାରମ୍ବାର ଏକ୍ସଟେନ୍ସନ୍ ଅଫ୍ ଟାଇମ୍ (ଇଓଟି) ମଞ୍ଜୁର କରିଚାଲିଛି ବିଭାଗ ।
ଇତିମଧ୍ୟରେ ପ୍ରକଳ୍ପର ଅଧିକାଂଶ କାର୍ଯ୍ୟ ଶେଷ ହୋଇଥିଲେ ବି ନଦୀ ଉପରେ ପାଇପ୍ ଲାଇନ୍ ବିଛା, ରେଳ ଧାରଣା/ରାସ୍ତା ପାର୍ଶ୍ୱରେ ପାଇପ୍ ଲାଇନ ବିଛାଇବା, ପ୍ରତ୍ୟେକ ହିତାଧିକାରୀଙ୍କ ଘରକୁ ସଂଯୋଗ ଆଦି ଅନେକ କାର୍ଯ୍ୟ ବାକି ଅଛି । ଏସବୁ କାର୍ଯ୍ୟ ସାରିବା ପାଇଁ ବିଭାଗ ପକ୍ଷରୁ ବାରମ୍ବାର ଠିକା ସଂସ୍ଥାକୁ ତାଗିଦ୍ କରାଯାଉଛି । ୯୦ ପ୍ରତିଶତ ଅର୍ଥ ଠିକାସଂସ୍ଥାକୁ ପଇଠ ହୋଇଥିଲେ ବି ସଂସ୍ଥାର ପାଖାପାଖି ୨୦୦ କୋଟି ଟଙ୍କା ଅମାନତ ରାଶି ବିଭାଗ ପାଖରେ ରହିଛି ବୋଲି କହିଛନ୍ତି ଭଦ୍ରକ ଜଳଯୋଗାଣ ଓ ପରିମଳ ବିଭାଗର ଅଧୀକ୍ଷଣ ଯନ୍ତ୍ରୀ । ବର୍ତ୍ତମାନ ସୁଦ୍ଧା ୫୨୬ଟି ଗାଁରୁ ୩୩୦ ପାଖାପାଖି ଗ୍ରାମକୁ ପାଇପ୍ ଜଳଯୋଗାଣ ଆରମ୍ଭ ହୋଇଥିବା ସୂଚନା ଦେଇଛନ୍ତି ଅଧୀକ୍ଷଣ ଯନ୍ତ୍ରୀ । ମେ’ମାସ ସୁଦ୍ଧା କାର୍ଯ୍ୟ ସାରିବାକୁ ଠିକା ସଂସ୍ଥାକୁ ନିର୍ଦ୍ଦେଶ ଦିଆଯାଇଥିବା ସୂଚନା ଦେଇଛନ୍ତି ଅଧୀକ୍ଷଣ ଯନ୍ତ୍ରୀ ।
(ରିପୋର୍ଟ: ସାଳନ୍ଦୀ ସମାଚାର)
ସମ୍ପୂର୍ଣ୍ଣ ଓଡ଼ିଆରେ ଓଡ଼ିଆ ଲୋକମାନଙ୍କ ପାଖରେ ମାଗଣାରେ ଖବର ପହଞ୍ଚାଇବା ପାଇଁ ଆମର ଏହି ସ୍ୱତନ୍ତ୍ର ପ୍ରଚେଷ୍ଟା । ନୂଆ ଖବର ଯେ କେବଳ ନୂଆ ନୂଆ ଖବର ସବୁବେଳେ ନେଇକି ଆସିବ ତାହା ନୁହେଁ, ଆମେ ନୂଆ ରୂପରେ, ନିଆରା ଢଙ୍ଗରେ ଖବର ପହଞ୍ଚାଇବୁ ଆମର ପାଠକମାନଙ୍କ ପାଖରେ । ସଭିଙ୍କ ଖବର ସର୍ବଲୋଚନ କରିବାପାଇଁ ଆରମ୍ଭ ହୋଇଥିବା ଏହି ପ୍ରଚେଷ୍ଟାରେ ଆପଣମାନଙ୍କର ସହଯୋଗ କାମ୍ୟ ।